31-வது பிறந்தநாளையொட்டி நயன்தாரா போப் ஆண்டவரிடம் ஆசி பெற்றார்..!!

நடிகை நயன்தாரா தனது 31-வது பிறந்தநாளையொட்டி ரோம் நகரில் போப் ஆண்டவரை சந்தித்து ஆசி பெற்றார்.

நடிகை நயன்தாரா, கேரளாவை சேர்ந்தவர். 1984-ம் ஆண்டில் நவம்பர் மாதம் 18-ந் தேதி பிறந்தார். அவருடைய சொந்த பெயர், டயானா மரியம் குரியன். சினிமாவுக்காக, நயன்தாரா என்று பெயரை மாற்றிக் கொண்டார். மலையாள படங்களில் நடித்து வந்த அவர், 2005-ம் வருடம் சரத்குமார் கதாநாயகனாக நடித்து, ஹரி டைரக்டு செய்த ‘ஐயா’ படத்தின் மூலம் தமிழ் பட உலகுக்கு கதாநாயகியாக அறிமுகமானார்.

தமிழ், தெலுங்கு, மலையாளம் ஆகிய 3 மொழி படங்களில், அவர் நடித்து வருகிறார். அவரை ரசிகர்கள், ‘லேடி சூப்பர் ஸ்டார்’ என்று அன்புடன் அழைத்து வருகிறார்கள்.

போப் ஆண்டவரிடம் ஆசி

நயன்தாராவுக்கு 30 வயது நிறைவடைந்து நேற்று 31 வயது பிறந்தது. தனது பிறந்தநாளையொட்டி அவர், போப் ஆண்டவரை சந்தித்து ஆசி பெற விரும்பினார். இதற்காக, கடந்த 13-ந் தேதி அவர் ரோம் நகருக்கு விமானம் மூலம் சென்றார்.

கடந்த 15-ந் தேதி (ஞாயிற்றுக்கிழமை) போப் ஆண்டவர் வாடிகன் நகரில் உள்ள புனித பீட்டர்ஸ் சதுக்கத்தில், பொதுமக்களுக்கு ஆசி வழங்கினார். அப்போது அவரிடம் நயன்தாராவும் ஆசி பெற்றார்.

நீண்ட கால ஆசை

‘‘போப் ஆண்டவரிடம் ஆசி பெற வேண்டும் என்பது என் நீண்ட கால ஆசை. அந்த ஆசை என்னுடைய 31-வது வயதில் நிறைவேறியது’’ என்று நயன்தாரா கூறினார்.

போப் ஆண்டவரிடம் ஆசி பெற்றபின், அவர் வெனீஸ் நகருக்கு சென்றார். வருகிற 26-ந் தேதி அவர் இந்தியா திரும்புகிறார்.

Tags: Cinema , சினிமா , நயன்தாரா , நயன்தாரா போப் ஆண்டவரிடம் ஆசி பெற்றார்